ភ្នំពេញ៖ នៅថ្ងៃទី២៦ ខែធ្នូ ឆ្នាំ២០២៤ អាជ្ញាធរជាតិដោះស្រាយវិវាទក្រៅប្រព័ន្ធតុលាការ បានបើកដំណើរការប្រឡងប្រជែងជ្រើសរើស មន្ត្រីសម្រុះសម្រួលដោះស្រាយវិវាទ ជំនាន់ទី២។ ការប្រឡងផ្ទាល់មាត់ត្រូវបានចាត់ចែងដោយគណៈមេប្រយោគ ដឹកនាំដោយលោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ។
ដំណើរការនៃការសម្ភាសនេះ ត្រូវបានប្រព្រឹត្តទៅដោយរលូន ត្រឹមត្រូវ ច្បាស់លាស់ និងប្រកបដោយតម្លាភាព ដោយមុនពេលសម្ភាស បេក្ខជនទាំងអស់ត្រូវបានត្រួតពិនិត្យ និងមិនអនុញ្ញាតឱ្យយកចូល ឬប្រើប្រាស់នូវសំណៅឯកសារ ទូរសព្ទ និងមធ្យោបាយទំនាក់ទំនងផ្សេងៗ ព្រមទាំងត្រូវចាប់ឆ្នោតជ្រើសរើសលំដាប់វេនសម្រាប់ការចូលសម្ភាស។
កិច្ចដំណើរការនៃការសម្ភាសនេះ ត្រូវបានធ្វើឡើងដោយឈរលើគោលការណ៍អនាមិកភាព ពោលគឺ ទាំងអត្តសញ្ញាណ អត្តលេខ លំដាប់លេខរៀងចូលសម្ភាសរបស់បេក្ខជននីមួយៗ មិនត្រូវបានបង្ហាញ នៅក្នុងអំទ្បុងពេលសម្ភាសនោះឡើយ។
មានបេក្ខជនចំនួន ៦០ រូប ត្រូវធ្វើការសម្ភាស ដែលត្រូវបានជ្រើសរើសជាប់នៅដំណាក់កាលទី១។
នៅក្នុងលទ្ធផលគួរឲ្យកត់សម្គាល់ លទ្ធផលស្ថាពរនៃការប្រទ្បងប្រជែងនេះ ត្រូវបានប្រកាសភ្លាមៗបន្ទាប់ពីការសម្ភាសន៍ ជាលទ្ធផលមានការជ្រើសរើសបេក្ខជនចុងក្រោយចំនួន ៣០ នាក់ក្នុងនោះមានស្ត្រី ៧ នាក់ រួមជាមួយបេក្ខជនបម្រុងចំនួន ៦ នាក់ ក្នុងនោះ ៦ នាក់ជាស្ត្រី៕
ព័ត៌មានជាច្រើនទៀតសម្រាប់អ្នក
